時間倒帶，我地又返返去小弟係英國實習嘅時候。
住得係醫院嘅病人，好多時候都每日要抽血去觀察病情，而當時病房姑娘為左比多D機會我練習（又或者自己唔想做），都會比我幫全病房抽血。
咁話說當時有個患有腦退化症嘅可愛婆婆，問佢任何問題，佢都話「好好好，你都係為左我好架啫」，搭多個和藹嘅笑容，跟住就會訓返著覺。
咁晨早流流，我又推住架車仔去幫佢抽血。
「婆婆，我黎幫你抽血呀！」
「好好好，你都係為左我好架...zzZ」
「拿！有小小痛呀下！」
「好好好，你都係為左...zzZ」
點知，枝針一督，婆婆就忽然扎醒左。
「哎喲！做咩流哂血呀！」
「抽血幫你做檢查呀！」
「抽血做咩會流血架！」
我呆左一呆，唔識答，跟住阿婆又忽然陷入返沉睡。
「好好好，你都係...zzZ」
其實抽血點可以唔流血...
係要等流鼻血個陣自然搜集...?
定係等女性姨媽到嘅時候叫佢留D比我...?
但係阿婆你姨媽都應該好耐無黎探你..........
#大英醫院實習記
Search